Տանիքից պոկված թիթեղից վնասված ծննդկանը մանրամասներ է հայտնել դեպքի և նորածնի վիճակի վերաբերյալ

Ուժգին քամու հետևանքով մայիսի 11-ին տան տանիքից թիթեղի մի կտոր պոկվել ու հարվածել է այդ պահին բակում գտնվող 23-ամյա 36 շաբաթական հղի Ռուզաննա Հարությունյանին՝ վնասելով նրա որովայնը: 

Կինն անմիջապես տեղափոխվել է «Էրեբունի» ԲԿ-ի ծննդատուն։ Հղիին հետազոտելուց հետո բժշկական կենտրոն մտնելուց ընդամենը 7 րոպե անց սկսվել է վիրահատությունը: Կատարվել է կեսարյան հատում, վերականգնվել է պատռված արգանդը: Ծնվել է 2450 գրամ քաշով 48 սմ հասակով աղջիկ` ճակատի ձախ շրջանում 5սմ երկարությամբ խորը վնասվածքով: 

«Արմենպրես»-ի հաղորդմամբ՝ թե՛ երեխան, թե՛ մայրն արդեն լավ են։

Մայիսի 14-ին լրագրողների հետ հանդիպմանը Ռուզաննա Հարությունյանը, որը նաև երկու տղա ունի, հիշեց՝ դուրս է եկել բակ՝ իր տղային ներս տանելու նպատակով, սակայն չի հասցրել մոտենալ երեխային, քանի որ տանիքից թիթեղը պոկվել ու հարվածել է իրեն, ինչի հետևանքով պատռվածք է ստացել և արյունահոսել։ 

«Կարճ ժամանակում բժշկուհի Նառա Սուրենովնան և Անահիտ Հովիկովնան արագ կազմակերպեցին կեսարյան հատումը, և ծնվեց բալիկը։ Փառք Աստծո, հիմա դրական փոփոխություններ կան և՛ երեխայի, և՛ ինձ մոտ»,-նշեց նա։

Ռուզաննան խոստովանեց՝ երբ հարված է ստացել, կարծել է՝ դժվար փրկվի, սակայն, ինչպես ինքն է ասում, Աստծո և բժիշկների շնորհիվ ինքն ու բալիկը փրկվել են ու լավ են։ Իրենց փրկությունը հրաշք է համարում։ Ռուզաննան դեռ չի տեսել նորածնին։ Հույս ունի՝ շուտով կտեսնի փոքրիկին։

«Էրեբունի» բժշկական կենտրոնի ծննդատան տնօրեն Անդրանիկ Պողոսյանը  45 տարվա աշխատանքային փորձի ընթացքում առաջին անգամ է նման դեպքի հանդիպում։

«Առաջին անգամ եմ տեսնում, որ բնության աղետի պատճառով հղի կինը նման վնասվածք ստանա։ Ճիշտ տակտիկա է վարվել։ Հղի կինը տեղափոխվել է սեփական տրանսպորտով։ Անմիջապես զննել են նրան, դիագնոզ արել։ Ելնելով կնոջ խոսքերից և հերթապահ բժիշկների պրոֆեսիոնալիզմից՝ երկուսից երեք րոպեի ընթացքում նրան նախապատրաստել են վիրահատության։ Վիրահատության կտրվածքը շատ ճիշտ է ընտրվել։ Հարվածն այնքան ուժեղ է եղել, որ նորածնի  ձախ քունքի վերևի շրջանում բավականին խորը պատռված է եղել»,-պատմեց նա։

Պատռվածքը կարել հնարավոր եղել է, սակայն չեն արել դա հետագա բարդություններից խուսափելու համար. հնարավոր է՝ երեխան գանգոսկրի կոտրվածք ունենար, արյունազեղումներ ուղեղում և այլն։ Երեխան տեղափոխվել է «Սուրբ Աստվածամայր» բժշկական կենտրոն, որտեղ  մանրամասն հետազոտություններ են արվել։ Այժմ երեխան լավ է։

Անդրանիկ Պողոսյանը հավաստիացրեց, որ Ռուզաննան դեռ կարող է երեխաներ ունենալ։

Մանկաբարձ Նառա Ադամյանն ավելի քան 15 տարի աշխատում է «Էրեբունի» ԲԿ-ի ծննդատանը։ Նա նշեց՝ սովորաբար վիրահատություններ կատարելու արագ որոշումներ չեն կայացնում, սակայն Ռուզաննայի դեպքն առանձնահատուկ է եղել։ «Դա մեզ ստիպեց արագ կողմոնորշվել, ճիշտ որոշում կայացնել ու չհապաղել, ինչի արդյունքում մենք ունենք առողջ մայրիկ ու երեխա»,-շեշտեց նա։