Սյունյաց թեմի առաջնորդանիստ Սուրբ Գրիգոր Լուսավորիչ եկեղեցում քահանայական ձեռնադրություն է կատարվել

Հիսուս Քրիստոսի Պայծառակերպության տոնին, Սյունյաց թեմի առաջնորդանիստ Սուրբ Գրիգոր Լուսավորիչ եկեղեցում (ք. Գորիս), Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի օրհնությամբ, Սուրբ Պատարագի ընթացքում կատարվել է քահանայական ձեռնադրություն:

Ինչպես «Արմենպրես»-ին տեղեկացրին Մայր Աթոռից, պատարագիչն է եղել Մայր Աթոռ Սուրբ Էջմիածնի «Գարեգին Ա» կրթական կենտրոնի տնօրեն Գերաշնորհ Տ. Վահան եպիսկոպոս Հովհաննիսյանը, որի ձեռամբ քահանայական ձեռնադրություն և օծում են ստացել Մայր Աթոռի տարբեր կառույցներում և թեմերում սպասավորող երեք սարկավագներ: Սուրբ Պատարագի ընթացքում Վահան Սրբազանը, քահանայության կոչելով նորընծաներին, Սրբալույս Մյուռոնով օծել է նրանց ճակատներն ու ձեռքերը, ինչպես նաև նորաօծ եկեղեցականներին շնորհել նոր հոգևոր անուններ:

«Բարեշնորհ Գևորգ սարկավագ Կադեյանը վերակոչվեց Տեր Պետրոս քահանա, Դավիթ սարկավագ Սահակյանը՝ Տեր Մովսես, իսկ Արմեն սարկավագ Իսահակյանը՝ Տեր Հակոբոս քահանա։ Այնուհետև նորաօծ քահանաներն իրենց անդրանիկ օրհնությունը փոխանցեցին ներկաներին:

Սրբազան Հայրը, իր քարոզում անդրադառնալով Հիսուս Քրիստոսի Պայծառակերպության տոնին, ի մասնավորի նշեց. «Պայծառակերպությամբ Քրիստոս իր աստվածությունն է հայտնում մեզ և մխիթարում այն խորհրդով, որ մեր հավատքի հիմնադիրը պարզ վարդապետ, մարգարե կամ հրաշագործ մի անձ չէ, այլ նույն ինքը՝ Աստված։ Քրիստոս մարմնացյալ Աստված է, ով երկնքից խոնարհվեց և բնակվեց մարդկանց մեջ և դրա համար նրան կոչեցին Էմմանուել, որ նշանակում է Աստված մեզ հետ»։

Վահան եպիսկոպոսը նաև ընդգծեց, որ Քրիստոսի Պայծառակերպության տոնը հրավեր է քրիստոնյաներին լինելու Աստծո ներկայության մեջ»,- հայտնում են Մայր Աթոռից։

Ըստ աղբյուրի՝ դիմելով նորաօծ քահանա հայրերին՝ Սրբազան Հայրը հորդորել է լինել մշակներ առանց ամոթի, ամուր` իրենց քահանայագործության մեջ, քաջ՝ փորձությունների մեջ:

Վերջում պատարագիչ Սրբազանը պատգամել է ժողովրդին նեցուկ և զորավիգ լինել քահանաներին Հայաստանյայց Առաքելական Սուրբ Եկեղեցու առաքելության զորացման համար։

Նշվում է, որ «Ողջույնի» ժամանակ ներկա հոգևոր դասը բարձրացել է Սուրբ Խորան և շնորհավորել նորաօծ քահանաներին՝ համբուրելով նրանց մյուռոնադրոշմ ճակատներն ու ձեռքերը:

Մայր Աթոռ Սուրբ Էջմիածնում քառասնօրյա պատրաստության շրջանից հետո նորընծա քահանաներն ծառայության են կոչվելու Հայաստանյայց Առաքելական Սուրբ Եկեղեցու տարբեր թեմերում և կառույցներում: