Ճապոնիային դուր չի գալիս Կորեական պատերազմի պաշտոնական ավարտը հայտարարելու գաղափարը

Ճապոնիայի իշխանությունները ոգևորված չեն Հարավային Կորեայի նախագահ Մուն Չժե Ինի կողմից Կորեական պատերազմի պաշտոնական ավարտը հայտարարելու գաղափարից և անհանգստացած են Սեուլի այս նախաձեռնությամբ։ Այս մասին հայտնում է ТАСС-ը՝ հղում անելով է Kyodo գործակալությանը ։

Տոկիոն մտավախություն ունի, որ նման քայլը կթուլացնի ճապոնական կողմի դիրքերը ԿԺԴՀ հետախուզական ծառայության կողմից առևանգված քաղաքացիների խնդրի լուծման հարցում, ինչպես նաև կպարզեցնի Փհենյանի միջուկային հրթիռային ծրագրի հետագա զարգացումը։ Գործակալության դիվանագիտական ​​աղբյուրների փոխանցմամբ՝ Ճապոնիան արդեն հայտնել է ԱՄՆ-ին իր մտահոգությունները, սակայն ամերիկյան կողմը դեռ հստակ չի հայտնել իր դիրքորոշումն այս հարցում։

Սեպտեմբերի 21-ին ՄԱԿ-ի Գլխավոր ասամբլեայի 76-րդ նստաշրջանի ժամանակ Կորեայի Հանրապետության նախագահը կոչ արեց շուտափույթ ստորագրել Կորեական պատերազմի (1950-1953 թթ.) ավարտի մասին հռչակագիրը, որն ավարտվել է 1953 թվականին զինադադարով։ Ֆորմալ առումով կողմերը դեռևս գտնվում են զինված հակամարտության վիճակում։