Դավիթ Սանասարյանի գործով դատական նիստը հետաձգվեց

Երևանի ընդհանուր իրավասության դատարանի Շենգավիթի նստավայրում հետաձգվեց Պետական վերահսկողական ծառայության նախկին պետ Դավիթ Սանասարյանի գործով հերթական դատական նիստը, քանի որ պաշտպաններից մեկը բացակա էր: Լրագրողների հետ զրույցում ՊՎԾ նախկին պետը նշեց. «Ինչպես տեսաք անհիմն պատճառով նիստը չկայացավ, բայց նաև այս միջոցով դատավարության մասնակիցներին կոչ եմ անում ժամանակին գալ դատարան: Չի կարելի այսպես անել, ես կես ժամ շուտ մտել եմ դատարան: Մի քանի ամիսը մեկ է նիստը լինում, անընդունելի է: Մենք հաջորդ դատին կանենք առաջարկներ: Հարցին, արդյոք ուշանալու մեջ միտում տեսնում է, Սանասարյանը պատասխանեց. «Չեմ ուզում նման միտում տեսնել, բայց այն, որ դատը դանդաղ է տեղի ունենում, դա շատ վատ է»: Սանասարյանի պաշտպան Արսեն Սարդարյանն էլ նշեց. «Դատարանները շատ ծանրաբեռնված են աշխատում և այդ հարցը դատավորը նախորդ նիստին բարձրացրել էր: Իր ծանրաբեռնվածությունը վկայակոչելով՝ դատավորը մի քանի անգամ խնդրել էր, որպեսզի դատավարության մասնակիցները չուշանան: Նման պայմաններում միտում փնտրելու խնդիր լինել չի կարող: Չեմ կարծում, որ մեր կոլեգան էլ միտումնավոր է ուշանում: Մենք բոլորի դրության մեջ մտնում ենք, բայց ունենք իրողություն, որ անմեղ մարդը եկել է դատարան և ուզում է արագ արդարադատության գործընթացում իր՝ արդար լինելը ցույց տա, բայց ինչքան կարող է սպասել արդարադատության»: Արսեն Սարդարյանն ընդգծեց՝ դատավորին չի մեղադրում, բայց ամիսներով ձգձգվում է գործընթացը և կարող է տևել տարիներ: Հիշեցնենք, Դավիթ Սանասարյանին մեղադրանք է առաջադրվել ՀՀ ՔՕ 308-րդ հոդվածի 1-ին մասով` պաշտոնեական լիազորությունները չարաշահելու համար: