Որոշ շրջանակներ կաշվից դուրս են գալիս՝ Օվերչուկի միտքը զարգացնելով. լավ գիտենք՝ ով ինչ «փորացավ» ունի. Թունյան

ԱԺ «Քաղաքացիական պայմանագիր» խմբակցության պատգամավոր Բաբկեն Թունյանը «Ֆեյսբուք»-ի իր էջում գրառում է կատարել՝ անդրադառնալով ՌԴ փոխվարչապետ Ալեքսեյ Օվերչուկի զգուշացմանը, որ եթե Հայաստանը միանա Եվրամիությանը, այն այլևս օդային կապ չի ունենա Ռուսաստանի հետ։ Թունյանը նաև անդրադարձել է այդ հայտարարությունը շրջանառող որոշ շրջանակների:

«Զգացե՞լ եք, թե լրագրողական ու փորձագիտական որոշ շրջանակներ ոնց են կաշվից դուրս գալիս՝ Օվերչուկի միտքը «թարգմանելով» ու զարգացնելով:

Գիտե՞ք՝ ինչ են ուզում ասել: Ուզում են ասել՝ «մենք մեզ պետք է խելոք ու հնազանդ պահենք, թե չէ մեծ «ձյաձաները» կջղայնանան ու մեզ կպատժեն՝ գազի գինը կթանկացնեն, արտահանումը կփակեն և այլն»:

Այսինքն՝ ռուսների փոխարեն իրենք են փորձում շանտաժ անել սեփական հայրենակիցներին:

Նախ՝ մենք «չարություն» չենք արել ու չենք անում: Եվ երկրորդ, հարգելի՛ «մտահոգներ», իսկ կարո՞ղ եք բացատրել, թե 20 տարի առաջ, երբ ձեր սրտի իշխանությունները հլու-հնազանդ էին «մեծ ձյաձաներին», ինչո՞ւ վերջիններս թանկացրին գազը:

Մոռացե՞լ եք 2006-ը, երբ ռուսական կողմը գազը թանկացրեց, և «սուբսիդավորման» անվան տակ գնի տարբերությունը՝ 188 մլն դոլար, Հայաստանը վճարեց Հրազդանի ՋԷԿ-ի 5-րդ բլոկը և Իրան-Հայաստան գազամուղը «Գազպրոմին» զիջելով: 3 տարվա էժան գազի դիմաց:

2013-ն է՞լ եք մոռացել, երբ տարեվերջին հանկարծ պարզվեց, որ ռուսական կողմը 2 տարի առաջ կրկին թանկացրել էր գազը, իսկ մեզ այդ մասին չէին ասել, որ տրամադրություններս չընկնի: Բայց կուտակել էինք 300 մլն դոլարի պարտք, ինչի դիմաց Հայաստանը հրաժարվեց «ՀայՌուսգազարդի» իր 20% բաժնեմասից:

Հիմա էլ զիջելու բան չկա, ուզում եք ինքնիշխանությո՞ւնը զիջենք:

Չի լինելու նման բան: Գազն էլ եթե որոշեն թանկացնել, թանկացնելու են, ոչ՝ ոչ:

Հայաստանի կառավարությունը ձեզնից լավ գիտի բոլոր տնտեսական ու էներգետիկ ռիսկերը, ու եթե չգիտեք, ասեմ՝ վերջին տարիներին էական քայլեր են կատարվել մեր էներգետիկ անկախությունը մեծացնելու ու գազից կախվածությունը թուլացնելու ուղղությամբ:

Իսկ դուք մի՛ ձևացրեք, թե մտահոգված եք գազի գնով, տնտեսության վիճակով ու մեր ժողովրդի սոցիալական խնդիրներով: Հայաստանում բոլորը շատ լավ գիտեն՝ ով ինչ «փորացավ» ունի»,- գրել է Թունյանը: