Կոտայքում վթարի է ենթարկվել ՀՀ Էկոնոմիկայի նախարարության զբոսաշրջության, մարքեթինգի և խթանման վարչության պետը

Օգոստոսի 26-ին Կոտայքի մարզում ավտովթարի է ենթարկվել ՀՀ Էկոնոմիկայի նախարարության զբոսաշրջության, մարքեթինգի և խթանման վարչության պետը։

Այս մասին գրում է shamshyan.com-ը:

Ըստ աղբյուրի, ժամը 19։20-ի սահմաններում Հրազդան-Հանքավան ավտոճանապարհի 3-րդ կմ հատվածում բախվել են Երևանի բնակիչներ, 32-ամյա Հայկանուշ Սահակյանի վարած Mercedes մակնիշի և 63-ամյա Ալբերտ Պետրոսյանի վարած Kia Rio մակնիշի ավտոմեքենաները։

Վթարի հետևանքով Ա․ Պետրոսյանը և վերջինիս ուղևորներ, Երևանի բնակիչ, 60-ամյա Գայանե Պետրոսյանն ու Կոտայքի մարզի բնակիչ, 46-ամյա Փիրուզա Քոչարյանը մարմնական վնասվածքներով տեղափոխվել են «Հրազդան» բժշկական կենտրոն, որտեղ անհրաժեշտ բուժօգնություն ստանալուց հետո տեղափոխվել են Երևանի «Էրեբունի» բժշկական կենտրոն։

Բախման հետևանքով Kia-ն դուրս է եկել երթևեկելի գոտուց և հայտնվել ձորակում։

Վթարի փաստով նախաձեռնվել է վարույթ։

shamshyan.com-ի տեղեկություններով, վարորդներից Հ․ Սահակյանը աշխատում է Էկոնոմիկայի նախարարությունում՝ որպես զբոսաշրջության, մարքեթինգի և խթանման վարչության պետ։