Բժիշկ-ռադիոլոգները կներգրավվեն Հայաստանում ախտորոշիչ ծառայությունների ոլորտի կանոնակարգման աշխատանքներում

Բժիշկ-ռադիոլոգները կներգրավվեն Հայաստանում ախտորոշիչ ծառայությունների (ռենտգեն, ԿՏ, ՄՌՏ) ոլորտի կանոնակարգման աշխատանքներում:

Այս մասին հայտնում են ՀՀ առողջապահության նախարարությունից:

Կարևորելով ախտորոշիչ բժշկական ծառայությունների ճշգրտության, որակի և անվտանգության հարցերը` առողջապահության նախարարի առաջին տեղակալ Լենա Նանուշյանը պատասխանատու ստորաբաժանումների և «Ռադիոլոգների հայկական ասոցիացիայի» ներկայացուցիչների հետ քննարկել է մի քանի ուղղություններով համագործակցելու հնարավորությունը`

գործելակարգերի մշակում, կլինիկական ուղեցույցների հետ համադրում,

բժշկական սարքավորումների գրանցում,

լիցենզավորման պահանջների վերանայում:

Հանդիպմանը ներկայացվել է նաև լիցենզավորման գործընթացի, բժշկական սարքավորումների նկատմամբ պահանջների սահմանման եվրոպական փորձը:

Մասնագետներն առանձնացրել են հնամաշ սարքավորումների շահագործման, ճշգրիտ ախտորոշիչ հետազոտությունների ցուցման, գործարանային սպասարկման, ճառագայթային անվտանգության պահպանման հետ կապված ներկայիս խնդիրները:

Պայմանավորվածություն է ձեռք բերվել սկսել համատեղ մասնագիտական քննարկումները` առաջին փուլում գործելակարգերի մշակման ուղղությամբ: