Նրանք առաքելություն ունեն փրկելու Կտրիճ Ներսիսյանին, բայց անունը դնում են՝ փրկում են եկեղեցին. Հարությունյան

ՀՀ վարչապետի աշխատակազմի ղեկավար Արայիկ Հարությունյանը «Ֆեյսբուք»-ի իր էջում գրառում է կատարել՝ անդրադառնալով ընդդիմության կողմից Մայր Աթոռում հավաքվելու կոչերին:

«Նրանք այսօր առաքելություն ունեն փրկելու Կտրիճ Ներսիսյանին՝ Շարքային Ռայանին, բայց անունը դնում են, որ փրկում են եկեղեցին «ազգային արժեքը վտանգված է» պաթոսային կարգախոսով:

Մտածեցի՝ նորից վերընթերցեմ տասը պատվիրանները: Դժվարությամբ գտա մեկը, այն էլ շատ վստահ չեմ, որ սրանք խախտած չլինեն:

Պատվիրաններ.

1. Ես եմ քո Տեր Աստվածը, ինձանից բացի այլ աստվածներ չպիտի լինեն քեզ համար (Ելից. 20:2-3):

2. Վերևում՝ երկնքում, ներքևում՝ երկրի վրա, և երկրի խորքի ջրերի մեջ եղած որևէ բանի նմանությամբ քեզ կուռքեր չպիտի կերտես (Ելից. 20:4):

3. Քո Տեր Աստծո անունը զուր տեղը չպիտի արտասանես: (Ելից. 20:7):

4. Հիշիր շաբաթ օրը, որպեսզի սուրբ պահես այն: (Ելից. 20:8):

5. Պատվիր քո հորն ու մորը (Ելից. 20:12):

6. Մի սպանիր (Ելից. 20:13):

7. Մի շնանար (Ելից. 20:14):

8. Մի գողանար (Ելից. 20:15):

9. Քո հարևանի դեմ սուտ վկայություն մի տուր (Ելից. 20:16):

10. Ոչ քո մերձավորի տան, ոչ նրա ագարակի վրա աչք մի ունեցիր: (Ելից. 20:17):

Հ.Գ. Կտրիճն էլ դուրս գա սրանց ընդառաջ, լրիվ կլինի կաստում-շլվար»,- գրել է Հարությունյանը:

Դեկտեմբերի 17-ին Հայ առաքելական եկեղեցու տասը եպիսկոպոսներ հանդես են եկել հայտարարությամբ, դիմել ժողովրդին և դեկտեմբերի 18-ին՝ ժամը 17:00-ին, հրավիրել Մայր Աթոռ Սուրբ Էջմիածին։

Այս հայտարարությունից հետո մեկ այլ հայտարարությամբ է հանդես եկել Հայ առաքելական եկեղեցու Արագածոտնի թեմը և հայտնել, որ դեկտեմբերի 18-ին՝ ժամը 19:00-ին, Արագածոտնի թեմի Բյուրականի Սուրբ Հովհաննես եկեղեցում նախատեսված միասնական ժամերգությունը կտեղափոխվի և տեղի կունենա Մայր Աթոռ Սուրբ Էջմիածնում նույն օրը՝ ժամը 17:00-ին:

Միևնույն ժամանակ Մայր Աթոռում հավաքվելու կոչեր են արել ընդդիմադիր մի շարք ուժեր: