Մենք բալանսավորման քաղաքականություն ենք որդեգրել, այն չի նշանակում, որ ՌԴ այցեր չենք ունենալու. վարչապետ

«Ուզում եմ հաստատել, որ ես մասնակցելու եմ, որովհետև ընդունել եմ ՌԴ նախագահի հրավերը»:

Այս մասին Ազգային ժողովում Կառավարության հետ հարցուպատասխանի ժամանակ հայտարարեց վարչապետ Նիկոլ Փաշինյանը՝ արձագանքելով «Քաղաքացիական պայմանագիր» խմբակցության պատգամավոր Զարուհի Բաթոյանի այն հարցին, որ մայիսի 9-ին Մոսկվա նախատեսվող այցի հետ կապված տարատեսակ մեկնաբանություններ կան, թե այցը, միջոցառումներին մասնակցելը չի վնասի Արևմուտքի հետ հարաբերություններին:

«Երկրորդ մասով ուզում եմ ասել՝ հրապարակային ենք արտահայտել, որ մենք բալանսավորված և բալանսավորման քաղաքականություն ենք որդեգրել, և այդ քաղաքականության մեջ չի մտնում ամենևին, որ մենք մի ուղղությամբ մեր հարաբերությունները կառուցելու ենք ի հաշիվ մեր այլ հարաբերությունների, կամ առավել ևս այդ քաղաքականության տրամաբանության մեջ երբեք չի եղել, որ մենք ՌԴ այցեր չենք ունենալու և ՌԴ-ի հետ հարաբերություններ չենք զարգացնելու»,- ընդգծեց վարչապետը:

Հիշեցնենք՝ ՀՀ վարչապետ Նիկոլ Փաշինյանը մարտի 14-ին ՌԴ նախագահ Վլադիմիր Պուտինի հետ կայացած հեռախոսազրույցի ընթացքում ևս հաստատել էր, որ ընդունում է Ռուսաստանի նախագահի հրավերը և մասնակցելու է մայիսի 9-ին Մոսկվայում կայանալիք տոնակատարություններին։