Ջոնսոնն ակնկալում է, որ հաջորդ շաբաթ հեռախոսազրույց կունենա Պուտինի հետ
Մեծ Բրիտանիայի վարչապետ Բորիս Ջոնսոնը ակնկալում է հաջորդ շաբաթ հեռախոսազրույց ունենալ Ռուսաստանի նախագահ Վլադիմիր Պուտինի հետ՝ կոչ անելով նրան դիվանագիտական երկխոսություն սկսել Ուկրաինայի հարցով։ ՏԱՍՍ-ի հաղորդմամբ՝ այս մասին ուրբաթ օրը հայտնել է բրիտանական կառավարության ղեկավարի գրասենյակի մամուլի քարտուղարը։
«Վարչապետը վճռական է ակտիվացնել դիվանագիտական ջանքերը և մեծացնել զսպվածությունը՝ Եվրոպայում արյունահեղությունից խուսափելու համար: Երբ նա հաջորդ շաբաթ խոսի նախագահ Պուտինի հետ, նա կընդգծի Ռուսաստանի հետքայլի և դիվանագիտական երկխոսության անհրաժեշտությունը», - ասել է մամուլի քարտուղարը:
Ինչպես իր հերթին ՏԱՍՍ-ին հայտնել է բրիտանական կառավարական շրջանակներում իրազեկ աղբյուրը, բացի Ռուսաստանի առաջնորդի հետ հեռախոսազրույցից, Ջոնսոնը մտադիր է մոտ օրերս շրջագայել տարածաշրջանով։ Գործակալության զրուցակիցը ճշտող հարցին ի պատասխան հավելել է, որ խոսքը Արեւելյան Եվրոպայի մասին է. Աղբյուրը չի հստակեցրել, թե որ երկիր կամ երկրներ է մտադիր այցելել Մեծ Բրիտանիայի վարչապետը։
Երեքշաբթի օրը Ջոնսոնը, ելույթ ունենալով խորհրդարանում, հայտարարել է Պուտինի հետ զրույցի պատրաստակամության մասին՝ քննարկելու Ուկրաինայի շուրջ ստեղծված իրավիճակը և անվտանգության հարցերը։ Դրանից հետո ռուսական պետության ղեկավարի մամուլի քարտուղար Դմիտրի Պեսկովը հայտնել է, որ Պուտինի և Ջոնսոնի զրույց դեռևս նախատեսված չէ։
Կարծիքներ