Իմ կինը «ՀայՓոստ»-ի պատմության մեջ ամենացածր աշխատավարձ ստացող տնօրենն է․ Կոնջորյան

Իմ կինը 5 տարի շարունակ աշխատել է «ՀայՓոստ»-ում, եղել է վարչության ղեկավար, հետո եղել է մրցույթ, որից հետո մրցութային խորհուրդը ընտրել է տնօրեն:

Այս մասին ասաց Ազգային ժողովի նախագահի տեղակալի թեկնածու Հայկ Կոնջորյանը՝ անդրադառնալով «Հայաստան» խմբակցության պատգամավոր Ագնեսա Խամոյանի հարցին, թե Կոնջորյանի կինը 2024 թվականի նոյեմբերին նշանակվել է «ՀայՓոստ»-ի տնօրեն, որտեղ նա ստանում է 3․6 մլն դրամ՝ այս համատեքստում որպես համեմատություն հիշեցնելով, որ վարչապետը 1․6 մլն դրամ է ստանում, ՀՀ նախագահը՝ 1․5 մլն:

«Իմ կինը «ՀայՓոստ»-ի պատմության մեջ ամենացածր աշխատավարձ ստացող տնօրենն է: Երբևէ «ՀայՓոստ»-ի պատմության մեջ չի եղել տնօրեն, որ ստանա այնքան աշխատավարձ, ինչքան ստացել է իմ կինը: Իմ կինը երբևէ ամենացածր աշխատավարձ ստացող պաշտոնյան է «ՀայՓոստ»-ում»,- ասաց նա:

Կոնջորյանը նաև հիշեցրեց, որ «ՀայՓոստ»ը 100 տոկոսով ինքնաֆինանսավորվող կառույց է, և որ իր կինն ու «ՀայՓոստ»-ի մյուս աշխատակիցները պետբյուջեից չեն վարձատրվում: