Լավրովն ու Մարկո Ռուբիոն քննարկել են Ստամբուլում կայացած ռուս-ուկրաինական բանակցությունների արդյունքները

Ռուսաստանի արտգործնախարարությունից հայտնել են, որ ամերիկյան կողմի նախաձեռնությամբ տեղի է ունեցել Ռուսաստանի և Միացյալ Նահանգների արտաքին քաղաքական գերատեսչությունների ղեկավարների հեռախոսազրույցը: Սերգեյ Լավրովը և Մարկո Ռուբիոն քննարկել են Ստամբուլում կայացած ռուս-ուկրաինական բանակցությունների արդյունքները։

Ըստ հաղորդագրության՝ Պետքարտուղար Ռուբիոն ողջունել է ռազմագերիների փոխանակման և հրադադարի պայմանների նախապատրաստման վերաբերյալ ձեռք բերված համաձայնությունը: Նա վերահաստատել է Վաշինգտոնի պատրաստակամությունը՝ այսուհետ էլ նպաստելու ռուս-ուկրաինական կարգավորմանը։

Լավրովը նշել է խաղաղության գործընթացներում Միացյալ Նահանգների դրական դերը: Ռուս դիվանագետը հաստատել է ամերիկյան կողմի հետ գործակցությունը շարունակելու Մոսկվայի պատրաստակամությունը։

Անդրադարձ է եղել նաև երկկողմ շփումների հեռանկարին, միջազգային և տարածաշրջանային այլ հարցերի։