Էրբիլում ԱՄՆ գլխավոր հյուպատոսության շենքը հրթիռային հարվածից չի տուժել

Իրաքյան Քրդստանի մայրաքաղաք Էրբիլ քաղաքում ԱՄՆ գլխավոր հյուպատոսության շենքը հրթիռային հարձակման ժամանակ չի տուժել։ Այս մասին կիրակի Twitter-ում հայտնել է Քրդստանի տարածաշրջանային կառավարության արտաքին կապերի բաժնի ղեկավար Լաուկ Ղաֆուրին։

«Գիշերը Էրբիլի ուղղությամբ մի քանի հրթիռ է արձակվել, որոնցից ոչ մեկը չի դիպել կառուցվող ԱՄՆ հյուպատոսության շենքին, սակայն հրթիռները դիպել են դրա շրջակա տարածքներին»,- գրել է նա։ Հարվածային գոտին գտնվում է օդանավակայանի և միջազգային կոալիցիոն ուժերի բազայի մոտ։

Քուրդիստանի 24 հեռուստաալիքը, վկայակոչելով իրավապահ մարմիններին, հաղորդել է, որ ընդհանուր առմամբ արձակվել է 12 բալիստիկ հրթիռ։ Ավելի վաղ Rudaw հեռուստաալիքը հայտնել էր, որ եղել է 14 հրթիռ, վնասվել է շենքը, որտեղ գտնվում է Քուրդիստանի 24 գրասենյակը, զոհեր ու վիրավորներ չկան, հեռուստաալիքը շարունակում է աշխատել։

Քրդական անվտանգության ուժերը հետաքննություն են անցկացնում հրետակոծության հետ կապված։ Տարածաշրջանի ղեկավարությունը տեղի ունեցածը որակում է ահաբեկչություն։ Մինչդեռ իրաքյան լրատվամիջոցները հայտնում են, որ հրթիռները չեն արձակվել իրաքյան տարածքից։

Ավելի վաղ Reuters-ը, վկայակոչելով ԱՄՆ-ի անանուն պաշտոնյային, հայտնել էր, որ հրթիռային հարձակումը զոհերի չի հանգեցրել ամերիկացի զինվորականների շրջանում։