Ճապոնիայի վարչապետը մտադիր է հեռախոսազրույց ունենալ Զելենսկու հետ

Ճապոնիայի վարչապետ Ֆումիո Կիսիդան մտադիր է երեքշաբթի օրը հեռախոսազրույց ունենալ Ուկրաինայի նախագահ Վլադիմիր Զելենսկու հետ, որի հետ նախկինում երբեք չի խոսել։ ՏԱՍՍ-ի հաղորդմամբ՝ այս մասին հայտնում է ճապոնական Fuji TV հեռուստաալիքը ՝ վկայակոչելով կառավարական աղբյուրները։

 Կիսիդան մտադիր է անդրադառնալ Ուկրաինայում մնացած Ճապոնիայի քաղաքացիների անվտանգությանը և կարծիքներ փոխանակել այս երկրի շուրջ ստեղծված ճգնաժամի դիվանագիտական ​​ճանապարհով հանգուցալուծման ուղիների շուրջ։

Երեքշաբթի ավելի վաղ Ճապոնիայի արտգործնախարար Յոշիմասա Հայաշին հայտարարել էր, որ Տոկիոն աջակցում է Ուկրաինայի շուրջ ստեղծված իրավիճակի խաղաղ կարգավորմանն ուղղված ջանքերին, սակայն չի բացառում Ռուսաստանի դեմ պատժամիջոցների կիրառումը իրավիճակի սրման դեպքում։ Միաժամանակ նա չի բացահայտել նման միջոցառումների կոնկրետ բովանդակությունը։