Միրզոյանը Թուրքիայի հետ հարաբերություններում շոշափելի արդյունքներ գրանցելու լավատեսություն ունի
Հայաստանի արտաքին գործերի նախարար Արարատ Միրզոյանը Թուրքիայի հետ հարաբերությունները կարգավորելու հարցում շոշափելի արդյունքներ գրանցելու լավատեսություն ունի:
«Արմենպրես»-ի փոխանցմամբ՝ այս մասին Միրզոյանը նշեց «Օրբելի ֆորում. կառուցելով խաղաղություն և բազմակողմանի համագործակցություն» խորագիրը կրող միջազգային համաժողովի ընթացքում՝ անդրադառնալով Հայաստանի կողմից բալանսավորված և բալանսավորման արտաքին քաղաքականություն վարելուն:
«Ռազմավարական գործընկերություն ունենք Միացյալ Նահանգների հետ, ռազմավարական երկխոսություն ունենք և փորձում ենք բարձրացնել գործընկերության մակարդակը Միացյալ Թագավորության հետ, մի շարք ԵՄ անդամների հետ։ Էականորեն խորացնում ենք մեր հարաբերությունները ԵՄ-ի հետ, ռազմավարական գործընկերություն ունենք Ռուսաստանի Դաշնության հետ։ Բազմիցս ասել ենք, թե ինչպիսի մեծ կարևորություն ենք հաղորդում մեր անմիջական հարևանների հետ հարաբերություններին. Վրաստանի և Իրանի հետ ունենք հիանալի հարաբերություններ, Ադրբեջանի հետ խաղաղությունը հաստատված է, փորձում ենք ավելի դետալիզացնել։ Թուրքիայի հետ ունենք շատ ինտենսիվ երկխոսություն և ես շատ մեծ լավատեսություն ունեմ այստեղ, որ կարող ենք աստիճանաբար շոշափելի արդյունքներ գրանցել: Չինաստանի հետ ռազմավարական գործընկերություն հռչակեցինք»,- մանրամասնեց Միրզոյանը:
Արտաքին գործերի նախարարը նշեց՝ Եվրոպական միության հետ հարաբերությունների խորացումը ևս այս պահին կարելի է միայն հավասարակշռության համատեքստում դիտարկել:
«Անշուշտ, այն պահից, երբ խոսք կլինի կոնկրետ ԵՄ-ին անդամակցելու Հայաստանի հայտի մասին, իմաստ կունենա նորից անդրադառնալ այդ հարցին, բայց այս պահին առնվազն մեր հարաբերությունները որևէ երկրի հետ հենց դիվերսիֆիկացիայի համատեքստում կարող են դիտարկվել»,- նշեց նախարարը:
Արարատ Միրզոյանը հավելեց՝ Հայաստանին հաջողվում է բոլորի հետ պահել հավասարակշռություն, ինչից շահում են նաև հարևան երկրները:
Կարծիքներ