Անվճար տրամադրվող դեղերի ցանկն ընդլայնվել է. որ հիվանդություններն են ավելացել

Կառավարությունն այսօր ընդունել է որոշում, որով առաջարկվում է փոխհատուցվող հիվանդությունների ցանկում ավելացնել թվով 6 նոր հիվանդություն: Այդ հիվանդությունների դեղերը երբևէ չեն տրամադրվել պետության կողմից:

Ըստ այդմ՝ դեղերը շահառուներին կհատկացվեն դրանց արժեքի լրիվ փոխհատուցմամբ:

Ցանկում ներառվել են հետևյալ հիվանդությունները՝ պատանեկան իդիոպաթիկ արթրիտ, առաջնային իմունոդեֆիցիտ, Կավասակիի հիվանդություն, նյարդաբանական խնդիրներով պայմանավորված համախտանիշեր, ցրված սկլերոզ, անվճար կտրամադրվեն նաև անհաս նորածինների համար նախատեսված դեղերը:

Ըստ հիմնավորման ՝ ներկայումս գործող իրավական ակտի համաձայն 3-րդ խմբի հաշմանդամություն ունեցող անձանց դեղերը, ամբուլատոր-պոլիկլինիկական ծառայության միջոցով հատկացվում են մասնակի փոխհատուցմամբ` 50 տոկոս զեղչով:

Կառավարության որոշմամբ առաջարկվում է ֆունկցիոնալության միջին աստիճանի սահմանափակումներ ունեցող անձանց (նախկին 3-րդ խմբի հաշմանդամություն ունեցող անձիք) ամբուլատոր-պոլիկլինիկական ծառայության միջոցով, անվճար տրամադրել հիմնական դեղերի ցանկում առկա դեղերը:

Հիմնական դեղերի անվանացանկը ևս լրամշակվել և թարմացվել է անհրաժեշտ նոր դեղերով: