Ղազախական ծագման ցորենը նույնպես կհասնի Հայաստան՝ կրկին Ադրբեջանի տարածքով. Պապոյան

ՀՀ էկոնոմիկայի նախարար Գևորգ Պապոյանը սոցցանցի իր էջում տեղեկացրել է, որ առաջիկայում Ադրբեջանի տարածքով Հայաստան կհասնի նաև ղազախական ծագման ցորենը:

«Սիրելի հայրենակիցներ, ունեմ ևս մեկ լավ լուր ապաշրջափակումից.

այս պահին ռուսական ծագման ցորենը ՌԴ-ից երկաթուղով տեղափոխվում է դեպի Հայաստան՝ Ադրբեջանի տարածքով։

Նշեմ նաև, որ ղազախական ծագման ցորենը նույնպես ճանապարհին է և մոտ օրերս կհասնի Հայաստան՝ կրկին Ադրբեջանի տարածքով»,- գրել է նախարարը։

Ինչպես ավելի վաղ հաղորդել էր ադրբեջանական APA-ն, նոյեմբերի 4-ին՝ ժամը 00:15-ին, Ադրբեջանի և Վրաստանի տարածքներով Ռուսաստանի Դաշնությունից տարանցիկ ճանապարհով մաքսազերծվել է հացահատիկով լի 15 վագոն՝ 1048 տոննա 800 կգ ընդհանուր քաշով, և ուղարկվել է Հայաստանի Դալարիկ կայարան։

Հիշեցնենք՝ հոկտեմբերի 21-ին էկոնոմիկայի նախարար Գևորգ Պապոյանը հայտարարել էր, որ շուտով Ակտաու-Բաքու, այնուհետև ադրբեջանական ու վրացական երկաթգծով ՀՀ կմտնի ղազախական ցորենի առաջին խմբաքանակը:

Ավելի վաղ Ադրբեջանի նախագահ Իլհամ Ալիևը ևս հայտարարել էր, որ Ադրբեջանը վերացրել է դեպի Հայաստան բեռների տարանցման բոլոր սահմանափակումները: