Հայաստանում կվերացվեն առևտրի տեխնիկական խոչընդոտները․ նոր ծրագիր է մեկնարկել
ՀՀ էկոնոմիկայի նախարար Վահան Քերոբյանը նոյեմբերի 10-ին մասնակցել է UNIDO ՄԱԿ-ի արդյունաբերական զարգացման կազմակերպության կողմից կազմակերպված «Աջակցություն Հայաստանում որակի ենթակառուցվածքների զարգացմանը» ծրագրի մեկնարկի միջոցառմանը։
Այս մասին տեղեկացնում է նախարարությունը։
Ողջունելով միջոցառման մասնակիցներին՝ նախարար Վահան Քերոբյանը կարևորել է ծրագիրը և համոզմունք հայտնել, որ վերջինիս իրականացման արդյունքում Հայաստանը կկարողանա վերացնել առևտրի տեխնիկական խոչընդոտները, ինչն ուղղակիորեն առնչվում է երկրի որակի ենթակառուցվածքի համակարգի զարգացման և միջազգային ճանաչման հետ:
«Լիահույս եմ նաև, որ ծրագրի արդյունքում Հայաստանի չափագիտական կարողությունները կհզորանան այնքան, որ հնարավորություն կունենան արդյունավետորեն մասնակցել ու ինտեգրվել միջազգային և տարածաշրջանային չափագիտական կառույցներին»,- հավելել է նախարարը։
Ծրագիրն իրականացվում է ՄԱԿ-ի արդյունաբերական զարգացման կազմակերպության և ֆինանսավորվում Եվրամիության կողմից:
Կարծիքներ